Як без дудкі, без дуды, ходзяць ногі не туды

8 жніўня бягучага года ў Беларускім дзяржаўным музеі народнай архітэктуры і побыту адбудзецца доўгачаканы фестываль, прысвечаны аднаму са старажытных беларускіх музычных інструментаў – дудзе.

Афіша.jpeg

Культура беларускай дуды як каштоўны складнік нематэрыяльнай спадчыны і адначасова сучаснай культурнай прасторы праяўляецца ў разнастайных формах, ведах і практыках. Яны ўключаюць сам інструмент, яго выраб, выканальніцтва, навучанне, тэрміналогію, народныя звычаі і фальклор. Рэгіянальныя традыцыі дударства на Віцебшчыне, Міншчыне, Гомельшчыне, Гродзеншчыне, Магілёўшчыне і ў г. Мінску ўнесены ў Дзяржаўны спіс гісторыка-культурных каштоўнасцей Рэспублікі Беларусь. Інфармацыйныя матэрыялы пра дударства на Беларусі можна паглядзець у Інвентары нематэрыяльнай культурнай спадчыны.

Для наведвальнікаў дударскага фэсту прадугледжан шэраг разнастайных мерапрыемстваў.

Так, у прасторы Свята-Пакроўскай царквы а 13:00 гадзіне адбудзецца лекцыя-дыскусія вядомага эксперта, дудара Алеся Лася «Гісторыя беларускай дуды: ад сярэднявечча да адраджэння ў XXI стагоддзі».

На Малай сцэне з 13:00 да 14:20 будзе працаваць інтэрактыўная зона «Як без дудкі, без дуды, ходзяць ногі не туды», дзе кожны жадаючы паспрабуе авалодаць майстэрствам ігры на беларускіх музычных інструментах на майстар-класах пад кіраўніцтвам вядомых музыкаў Уладзіміра Берберава, Віктара Кульпіна і Ігара Адасіка. На міні-выставе кожны ахвочы зможа бліжэй пазнаёміцца з народнымі інструментамі.

На працягу трох гадзін (13:00 – 16:00) будзе працаваць кірмаш рамеснікаў «Горад майстроў», дзе можна набыць сувеніры і музычныя інструменты. Таксама пройдзе практычны майстар-клас па вырабе дудак і жалеек.

Кульмінацыяй фестывалю стане святочны канцэрт «Адчуй голас беларускай зямлі!», які адбудзецца на Галоўнай сцэне музея ў 14:30 з удзелам творчых калектываў «Гасцінец», «Дударыкі», «Самагуды» і інш.

НЦРК_1.jpg