“Традыцыі і сучаснасць”: у адной лодцы”

У мастацкай галерэі ДУ «Мінскі абласны цэнтр народнай творчасці» 16 кастрычніка 2025 года  у 18.00  адбудзецца адкрыццё выставы  «Традыцыі і сучаснасць: у адной лодцы»

 

У адной выставачнай прасторы будуць прадстаўлены розныя мастацкія накірункі, аб’яднаныя адным вобразам-тэмай “лодка/карабаль” ў прафесійным сучасным жывапісе і традыцыйным інсітным мастацтве.

Свет традыцыйнай культуры будзе прадстаўлены маляванымі дыванамі Паўла Яўхімавіча Марціновіча (1911–1981) з фондаў Любанскага музея народнай славы. Павел Марціновіч (нарадзіўся і жыў у вёсцы Засмужжа Любанскага раёна) пачаў маляваць дываны яшчэ ў 1930-я гады, але найбольш запатрабаванымі яго работы сталі ў пасляваенны час: узнаўляліся разбураныя вёскі, людзі прагнулі прыгажосці і мроілі аб светлай будучыні. Найбольшай папулярнасцю ў замоўцаў карысталіся дываны з «лодкай», якія Павел Яўхімавіч ствараў у некалькіх адпрацаваных варыяцыях. Інсітны мастак у сваіх працах здолеў стварыць уласны фантастычны свет з персанажамі і законамі быцця.

Як прыклад сучаснага маляванага дывана ў экспазіцыю ўключаны твор Народнага майстра Рэспублікі Беларусь Вольгі Пілецкай, які яна адмыслова падрыхтавала да выставы.

Шматграннасць сэнсавага напаўнення выставе надаюць жывапісныя працы сучасных беларускіх прафесійных мастакоў. Напісаныя пад натурнымі ўражаннямі карціны з вадаёмам і лодкамі, як натуральнай часткай беларускага краявіду прадставілі Юлія Мацура і Антон Вырва. Праз фільтры аўтарскага дэкаратыўнага бачання вобраз лодкі/карабля ў ландшафце паказаны Васілём Матусевічам і Андрэем Карпянковым. Сімвалічнасць вобраза лодкі, як «каўчэга» з самым каштоўным для чалавека мы можам знайсці ў фантастычных творах Анатоля Концуба.

 

Выстава працуе з 16 кастрычніка па 16 лістапада 2025 г.

Месца правядзення: мастацкая галерэя «Цэнтр» ДУ «Мінскі абласны цэнтр народнай творчасці»

Адрас: Мінск, вул. Гікалы, 4

Час працы: серада-нядзеля: 11:00 — 19:00

Інфармацыйныя матэрыялы і фота грамадска-асветніцкай газеты «Культура», ДУ «Мінскі абласны цэнтр народнай творчасці»